محاكاة
عندك ميزانية تسويق. وين بتحطها؟
وزّع ميزانيتك على القنوات الخمس وشوف شو بترجّعلك. لما تخلص، بوريك توزيعي أنا وليش.
قبل ما تلعب، ثلاث نقاط لازم تكون واضحة
- الرقم شهري ومتكرر. لو اخترت ١٠٠٠ دينار، هاي ميزانية كل شهر. مش دفعة وحدة. ولهيك رقم الشهر الأول ورقم الشهر السادس بيطلعوا مختلفين.
- «الموقع والـ SEO» صرف شهري مستمر. صفحات جديدة، تحسينات، محتوى، وترتيب بجوجل. بناء موقع من الصفر مشروع لحاله وله ميزانية لحالها، لا تقرا ٢٠٠ دينار هون على إنها سعر موقع.
- هاي ميزانية التنفيذ، مش أتعابي. المبلغ اللي بتوزّعه بيروح لميتا، وللتصوير والإنتاج، وللاستضافة والأدوات، مصاريف بتدفعها بغض النظر عن مين بيشتغل معك. أتعابي مقابل القرارات اللي بتخلّي هالمصاريف ترجّع بدل ما تضيع، وبنتفق عليها لحالها حسب حجم الشغل.
كل دينار بتزيده على قناة، بيطلع من القنوات الثانية، زي الواقع بالضبط.
النتيجة المتوقّعة
عميل محتمل بالشهر الأول
156
تكلفة العميل الواحد
6.4د
عملاء بالشهر السادس
364
عميل خلال سنة
3,743
المضاعِفات: بتضرب نتيجة كل القنوات. أقل من 1.00 يعني بتخسر من نتيجتك.
هاي محاكاة تعليمية مبنية على متوسطات السوق الأردني وتجربتي بالشغل. الأرقام تقريبية وبتتغيّر حسب مجالك ومنتجك وجودة التنفيذ، وهي ميزانية تنفيذ شهرية ما بتشمل أتعابي. «عميل محتمل» = رسالة أو استفسار أو تعبئة نموذج. مش عملية بيع مكتملة.
شو ورا الأرقام
ما في صندوق أسود. هاي الست قواعد اللي بتشتغل عليها المحاكاة، وكل وحدة فيهن إشي شفته بيصير على حسابات حقيقية.
كل قناة إلها سقف
بعد حد معيّن من الصرف، كل دينار زيادة بنفس القناة بيرجّع أقل من اللي قبله. لهيك مضاعفة ميزانية الإعلان بالنادر بتضاعف العملاء.
الموقع بيضاعف كل إشي ثاني
الإعلان بيوقّف الشخص، والموقع هو اللي بيقنعه. بدون موقع، كل قنواتك بتشتغل بـ 60٪ من قوّتها تقريباً. ومع موقع منيح، بتطلع فوق الـ 100٪.
الهوية ما بتبيع، بس بتخلّي البيع أرخص
الهوية والمواد الإبداعية ما بتشتري وصول لحالها. بتخلّي كل شخص أصلاً وصلك يصدّقك. وهاد بيرفع نتيجة كل القنوات دفعة وحدة.
محدا بيشتري من أول لقاء
الشخص بيشوف إعلانك، وبعد فترة بيلاقي محتواك، وبعدين بيفوت عالموقع. وقتها بيصدّقك. التوزيع على قنوات بيغلب تكديس كل إشي بمكان واحد.
في صرف بيوقف نفس اليوم اللي بتوقف تدفع فيه
الإعلان بينتهي لما تنتهي البطاقة. المحتوى والـ SEO بيضلوا شغالين وبيتراكموا. لهيك رقم الشهر الأول ورقم الشهر السادس بيحكوا قصتين مختلفتين.
الميزانية إشي، والسعر إشي ثاني
كل الأرقام بالمحاكاة ميزانية تنفيذ شهرية: بتروح لميتا، وللتصوير والإنتاج، وللاستضافة والأدوات. هاي مصاريف بتدفعها بغض النظر عن مين بيشتغل معك. أتعابي منفصلة عنها تماماً، ومقابل القرارات اللي بتخلّي هالمصاريف ترجّع بدل ما تضيع، وبنتفق عليها بعد ما نحكي عن مشروعك، مش من سلايدر.